Rita Li
Om te sing en te dans gee ons die ritme tot die lewe
In die nuus:
Rita Li genomineer vir SAMA28 2022 toekenning
"Beste pop album"
.jpeg)
Biografie
Rita Li is ’n Suid-Afrikaanse musikant, liedjieskrywer en fisioterapeut van Clocolan in die Vrystaat. Deesdae woon sy in Pretoria saam met haar man twee woelwater seuntjies.
Hierdie borrelende blondine het vir tien jaar in haar eie praktyk as sportfisioterapeut gewerk voordat sy haar kantoorsleutels permanent opgehang het vir haar sangloopbaan en sedertdien het sy verskeie hoogtepunte behaal en al by van die land se grootste feeste opgetree.
Dié sangeres is al van kleintyd af versot op musiek en neem al vir meer as vyftien jaar professionele sanglesse. As tiener het sy ook – as finalis van ’n Vrystaatse sangkompetisie – die geleentheid gehad om ’n solo-optrede te doen saam met ’n volledige simfonie-orkes by die Sand du Plessis-teater. Dis waar die groot drome vir die verhoog in haar binneste geplant is.
Deur die jare het sy nie net die klavier en dwarsfluit bemeester nie, maar ook ’n afrigtingskwalifikasie in tapdans behaal.
Verder is sy ook mal oor Perde Polo en het sy die land al op internasionale vlak verteenwoordig as speler en sanger van verskeie Nasionale Volksliedere by groot byeenkomste.
In 2019 het sy haar eerste enkelsnit uit die pen van Johan Oberholzer, My Eerste My Laaste, vrygestel wat baie goed ontvang is. Dit is in die eerste week van vrystelling gekroon as Jacaranda FM se Hot Hit en het op die treffersparades van verskeie radiostasies verskyn. ’n Musiekvideo van dié snit kan ook aanlyn en op die kassie gesien word.
Iemand Anders, wat deur Dewald Wasserfall en Danny Smoke geskryf is, is in Februarie 2021 uitgereik en word landswyd deur verskeie radiostasies gespeel en spog met verskeie Nr 1 toekennings op treffersparades. Beide snitte vorm deel van haar debuut-album, Roekeloos Verlief. Die album is in April 2021 vrygestel en het binne die eerste paar dae onder die top 5 Afrikaanse albums op Apple se musieklys geseëvier! Hierdie album en verskeie musiekvideo’s van die enkelsnitte is op alle digitale platvorms beskikbaar.
Die kunstenaar geniet ’n wye verskeidenheid musiek, maar sonder Lady Antebellum en Elvis Blue uit as haar grootste inspirasie.
In 2021 het sy die verhoog met van die land se grootste name soos Corlea, Monique Steyn, Ruhan du Toit, Dewald Wasserfall en Ivan Roux gedeel tydens in ’n Mini Afrikaans is Groot produksie vir kersfees. 'n Loopbaan hoogtepunt!
Haar nuutste konsertreeks “ Vroue van Vuur” skop in Mei 2022 af en hierdie inisiatief met sy konserte beloof heerlike glansgeleenthede vir vroue te wees om bietjie asem te skep uit die alledaagse en die mooi van vrouwees te kom vier en bederf te word.
Die musiekbedryf het haar geleer om geduldig te wees en hard te werk om sukses te bereik en nooit op te gee nie.
“Ek sou graag wou hê dat luisteraars hulle eie storie in my musiek moet vind en die emosie wat daarmee gepaard gaan moet beleef,” sê sy. “Dit is vir my belangrik dat bewonderaars moet kan saamsing en aanklank vind by my liedjies en dat dit hulle moed sal gee op ’n af dag.”
Musiek Video's
Konsert besprekings:
epos: besprekings@ritali.co.za
KONTAK MY
